કંસારા બજાર/છત નીચે

છત નીચે

છેક તાળવેથી ખેંચીને લંબાવે છે જીભ
તોયે સરકી જાય છે જીવડાં
આ ગરોળીની જીભ તળેથી,
ભૂખ્યા પેટે ક્યાં સુધી પકડી શકશે એ છતને?
આ ગરોળી જો ફ્લાઈંગ લીઝર્ડ બનીને ઊડી જશે
તો આ છત તો તૂટી જ પડવાની.
હવામાં બાચકાં ભરીને ગરોળી કદાચ જીવી જશે
પણ આ ગગનચુંબી ઇમારતનું શું થશે?
આવી બટકણી છતવાળા ઘરમાં
આપણે ક્યાં સુધી સાથે રહી શકીશું?
ઉચાટ જીવે ગરોળીને જોઈએ છીએ,
ક્યાં સુધી પકડી રાખશે એ છતને?