કાવ્ય-આચમન શ્રેણી – મરીઝ/તમને છુપાવ્યાં

૩૨. તમને છુપાવ્યાં

જુઓ શી કલાથી મેં તમને છુપાવ્યાં!
ગઝલમાં પણ આવ્યા તો નામે ન આવ્યાં.

હવે જિંદગીભર રૂદન કરવું પડશે,
કે મોકા પર આંખોમાં આંસુ ન આવ્યાં.

સફળતાના કિસ્સામાં રંગ લાવવાને,
કહો એ પ્રસંગો તમે જ્યાં ન ફાવ્યાં.

જીવન આવું ટૂંકું ને લાંબી પ્રતીક્ષા,
મેં તેથી પળેપળનાં વર્ષો બનાવ્યાં.

તમે પણ કોઈ વાત મનથી ન કીધી,
અમે પણ કોઈ વાત મનમાં ન લાવ્યાં.

કદી એને મળશું તો પછી લઈશું,
વચન કોને દીધાં, ને ક્યાં જઈ નભાવ્યાં.

‘મરીઝ’ આવું સુંદર લખે અમને શક છે,
બીજાની કને એણે કાવ્યો લખાવ્યાં.

(આગમન, પૃ. ૧૦૫)