ગુજરાતી ગઝલસંપદા/અંબાલાલ ‘ડાયર’
અંબાલાલ ‘ડાયર’
જિંદગીની છે ખુમારી મોતની ધમકી ન દો!
મોતની સાથે છે યારી મોતની ધમકી ન દો!
રાખજે અંકુશમાં સૌ તીર ને તલવારને,
તોપ માથે છે સવારી મોતની ધમકી ન દો!
બેધડક સંગ્રામ ખેલીને વિષમતાથી સભર,
મેળવી જીત એકધારી મોતની ધમકી ન દો!
માપ કાઢ્યું છે કસીને મોતની તાકાતનું,
છે બિચારાને બીમારી મોતની ધમકી ન દો!
કાળને બંધન અને સત્તાની સીમા હોય છે,
આ હકીકતને સ્વીકારી મોતની ધમકી ન દો!
શ્વાસ છે તો આશ છે ને આશ પર વિશ્વાસ છે,
છે સબળ શ્રદ્ધાની ક્યારી મોતની ધમકી ન દો!
નરકની દહેસત બતાવી ના કરો અવહેલના,
સ્વર્ગ છે મુઠ્ઠીમાં મારી મોતની ધમકી ન દો!
કંટકોને ડંખ કાપીને કર્યા છે શસ્ત્રહીન,
એ ગયા છે દાવ હારી મોતની ધમકી ન દો!
પ્રેમવશ થઈ મોતને જાતે નિમંત્રણ આપશું,
છે અમારી રીત ન્યારી મોતની ધમકી ન દો!