ગુજરાતી નારીસંપદા : કવિતા/આનંદનાં ફુવારા
આનંદના ફુવારા
ભૂમા વશી
⯐
ઉમટે આનંદનાં ફુવારા રે ભીતરથી
ઉછળે સુગંધનાં ફુવારા,
એક એક દીવાની જ્યોત બધે દીસે છે
ઉમટે અજવાસનાં ફુવારા,
રે આજ સખી ઉમટે આનંદનાં ફુવારા-
ઉમટે ઉમંગના ફુવારા રે ભીતરથી
થનગન ચાલે છે પાય મ્હારાં,
કલરવ છે, ટહુકા છે, કિલકારી ચારે કોર
સંભળાતા સૂર બધાં તારાં,
રે આજ સખી ઉમટે આનંદનાં ફુવારા-
આખું યે આભ મારી ભીતર દેખાય મને
ચમકંતા તેજનાં સિતારા,
છલકંતા, વિસ્તરતાં, ફેલાતાં જાય હવે
ભીતરનાં વ્હાલનાં ફુવારા,
રે આજ સખી ઉમટે આનંદનાં ફુવારા-
મઘમઘતાં રંગભર્યાં ફૂલોની સંગ ખીલી,
મહેકાવું એક એક ક્યારા,
ભીંજાણી એવી આજ અનહદ ભીંજાણી,
હવે સઘળાં લાગે છે મને પ્યારા,
રે આજ સખી ઉમટે આનંદનાં ફુવારા-
***