ગુજરાતી નારીસંપદા : કવિતા/રંગસૂત્રોની જોડી...

રંગસૂત્રોની જોડી...

રાધિકા પટેલ

⯐

આજે ભલે તું-
મોં ફેરવી-આંખો બંધ કરી લે…
કાલે સવાર પડતાં જ-
હું સૂર્યનું પહેલું કિરણ બની
તારે આંગણે ઉતરીશ.
તારા ઓરડામાં અજવાળું બની પથરાઈ જઈશ.
તારે-
તારી આજુ-બાજુની સજીવ-નિર્જીવ વસ્તુ પર
દૃષ્ટિપાત કરવા માટે
ફરજિયાત પણે
મારી આર-પાર નીકળવું પડશે...!!

જો કોઈ કારણસર
તું આંખો નહીં ખોલે તો;
હું કિરણથી વિખૂટી થઈ-
તારી આસપાસની હવામાં
સુગંધ બની ફેલાઈ જઈશ.
પછી, તારા શ્વાસ મારફતે તારા ફેફસાંમાં- અને તારા
હૃદય સુધી પંહોચી જ જઈશ..!
તારી રક્તવાહિનીઓમાં ફેલાઈને
તારા શરીરના કરોડો કોષોમાં-હું
મારું ઘર બનાવીશ..!
અને છેવટે એ કરોડો કોષોના
કોષ કેન્દ્રમાં જઈ ચિતરાઈ જઈશ.
રંગસૂત્રોની એ જોડીને
તું અલગ કરીને બતાવજે...!!!

***