તારાપણાના શહેરમાં/સૌંદર્યબોધ

The printable version is no longer supported and may have rendering errors. Please update your browser bookmarks and please use the default browser print function instead.


સૌંદર્યબોધ

સ્હેજ કોમળ રંગ તડકો, સ્હેજ વાદળ રંગરંગ
ફૂલની એવી તરસ જાગી કે ઝાકળ રંગરંગ

એક પડછાયો પડ્યો એવો, સકળજળ રંગરંગ
એનો પડઘો એમ હૈં ડૂબ્યો કે ખળખળ રંગરંગ

હર ગતિ કે હર સ્થિતિ કે હર કોઈ સ્થળ રંગરંગ
એક એની શક્યતા ને સર્વ અટકળ રંગરંગ

મય–સમય* ફીણ્યા કરે હર પળ ધવલ છળ રંગરંગ
ખોબલે લૂંટાવ પરપોટા પળેપળ રંગરંગ

એ ભલે નિર્લેપ છે પણ એમ કૈં નીરસ નથી
સાવ તો અમથાં નથી હોતાં કમળદળ રંગરંગ

સ્વપ્નમાં પણ કૈં લખ્યાની કલ્પના સુધ્ધાં નથી
જાગીને જોઉં તો મારો કોરો કાગળ રંગરંગ

* મહાભારતમાં આવે છે તેવા માયાવી સ્થપતિ જેવો સમય; મયથી છકેલો સમય