રમણીક સોમેશ્વરની કવિતા/છાપાની કોલમના

૫. છાપાની કૉલમના...

છાપાની કૉલમના કહેવાતા લોકોની
⁠કહેવાતી ઘટના તે આપણે
⁠નથી સહેવાતી ઘટના તે આપણે!

હોનારત હોનારત રમતા સૌ લૌક
⁠અહીં છાપાની આસપાસ ફરતા,
પોતાની જાતના અકસ્માતો ભૂલીને
⁠છાપાની કૉલમમાં મરતા
છાપેલા ફોટામાં મોઢે મલકાટ
⁠અને પોક પોક રડતા તે આપણે
⁠રોજ આપણને નડતા તે આપણે!

ઊડતી નજરથી જ આપણને વાંચીને
⁠આપણે જગવીએ ચકચાર
આપણું આકાશ સદા કોરું કટાક
⁠અને આગાહી હોય ધોધમાર;
બીબામાં ઢાળેલા અક્ષરની જેમ
⁠રોજ જિવાતી ઘટના તે આપણે
⁠આમ કહેવાતી ઘટના તે આપણે
⁠નથી સહેવાતી ઘટના તે આપણે!