વિનોદ જોશીનાં કાવ્યો/આ રીતે મળવાનું નંઈ!
જો, આ રીતે મળવાનું નંઈ!
દરિયો તો હોય, તેથી નદીએ કંઈ દોડીને
આ રીતે ભળવાનું નંઈ!
પાંદડી ગણીને તને અડક્યો, ને
મારામાં ઊડઝૂડ ઊગ્યું એક ઝાડ,
ખિસકોલી જેમ હવે ઠેકીને
એક એક રૂંવાડે પાડે તું ધાડ;
છીંડું તો હોય, તેની ઊભી બજારેથી
આ રીતે વળવાનું નંઈ!
એમ કાંઈ એવું કહેવાય નહીં,
કહેવાનું હોય કોઈ પૂછે જો તો જ,
જેમ કે અનેક વાર તારામાં
ભાંગીને ભુક્કો હું થઈ જાતો રોજ;
જીવતર તો હોય, તેથી ગમ્મે ત્યાં ઓરીને
આ રીતે દળવાનું નંઈ!