સમગ્ર અરધી સદીની વાચનયાત્રા/વિનોદ ભટ્ટ/બનાવટી!
પિકાસોના નામે એક કિસ્સો ચડેલો છે. ચિત્રોની દલાલી કરતા એક વેપારીએ પિકાસોની સહીવાળું પેઇન્ટિંગ તેને બતાવી પૂછ્યું : “આ ચિત્ર તમે બનાવેલું છે?”
“ના. આ બનાવટી છે.” પિકાસોએ જણાવ્યું. આવું ત્રણેક વખત બન્યું. વળી, એક ચિત્ર બતાવતાં દલાલે પિકાસોને પ્રશ્ન કર્યો : “આ ચિત્ર તો તમારું દોરેલું જ છે ને?”
“ના જી, બનાવટી છે…” પિકાસોએ કહ્યું.
“પણ એક વાર મેં પોતે તમને આ ચિત્ર પર કામ કરતા જોયા હતા…” દલાલ બોલ્યો.
“જોયો હશે… ક્યારેક ક્યારેક હું બનાવટી ચિત્રો પણ દોરું છું,” પિકાસોએ ખુલાસો કર્યો. કહેવાનો ભાવાર્થ એટલો જ કે, ક્યારેક હું બનાવટી ચિત્રો પણ દોરું છું, જે મારી-પિકાસોની અસલ કળા સુધી પહોંચી શકતાં નથી.
[‘પરબ’ માસિક : ૨૦૦૬]