સમગ્ર અરધી સદીની વાચનયાત્રા/સુમન મજમુદાર/મેઘ

ધોમધડાકા, વ્યોમ-કડાકા, વાદળીઓની દોટમદોટ;
પવન ફૂંકાયા ધરતી ઉપર, ધૂળ તણા ત્યાં ગોટમગોટ;
ચમકે વીજળી અપરંપાર, મેઘ વરસતો અનરાધાર.

ગિરિવર કેરાં શિખરો ઝળક્યાં, ખળક્યાં ઝરણાં અપરંપાર;
નદીઓ માંહે નીર ઉમટિયાં, નવાણ છલક્યાં ભારોભાર;
ખેડુ હલકે કરે પુકાર, મેઘ વરસતો અનરાધાર.

મયૂરો ટહુક્યા, કોયલ કૂકી, મીઠો કંઠ તણો રણકાર;
ચકલાં ચાલ્યાં માળામાં ને ચાતક હળવો મનનો ભાર;
રણકે ડોબાં સાંજ-સવાર, મેઘ વરસતો અનરાધાર.