હેમંત ધોરડાનાં ચૂંટેલાં કાવ્યો/મારે માટે એક પથ્થર પણ એ ના આઘો કરે
મારે માટે એક પથ્થર પણ એ ના આઘો કરે
એ જો ચાહે તો એ જળ વચ્ચેથી પણ રસ્તો કરે
મારા ધૂસર હોઠ પર એ આંખ ઠેરવતાં નથી
એક નજર નાખે તો એ પટ રેતનો લીલો કરે
મારે માટે દાઝવાનું ચાંદની રાતોમાં પણ
એના શિર પર તો હવા પણ તાપમાં છાંયો કરે
એની સાથે હું જ શું બસ મારો સરવાળો કરું
મારી સાથે એ કદી તો એનો સરવાળો કરે
રાતદિન શું આમ રહેવાનું જ છે ખાબડખૂબડ
મારે માટે શું કદી પાલવ એ ના સરખો કરે
છંદવિધાન
ગાલગાગા ગાલગાગા ગાલગાગા ગાલગા