અર્વાચીન ગુજરાતી કાવ્યસંપદા/નલિન રાવળ/સ્મરણમંજરી

સ્મરણમંજરી

નલિન રાવળ

ઉત્તુંગ ગિરિમાળાથી આચ્છાદિત
પિનાંગ
અને
કાશ્મીરની એ નયનરમ્ય નિસર્ગશ્રી
કલકલ ધ્વનિથી વહેતી
થેમ્સ
અને
ગંગાની એ શીતલ જળલહરી!
લયાન્વિત કાવ્યશૈલીથી દીપ્ત
કીટ્સ
અને
કાન્તની એ અંતર્ગૂઢ કવિતા
છંદોબદ્ધ પ્રણયકાવ્યોના પરમ
ઉદ્ગાતા યેટ્સની
એ પ્રણયાર્દ્ર દૃષ્ટિ!
આધુનિક સમાજની
મર્માન્તક કવિતાના સર્જક
એલિયટની
મનુષ્યના અંતરકામ પર વરસતી
એ કરુણામય દૃષ્ટિ!
કથનકળાના કસબી
જેન ઓસ્ટિન
અને શરદચંદ્રની એ અદ્ભુત
સાહિત્યસૃષ્ટિ!
કમનીય અભિનયથી તરવરતી
ઓડ્રિહેપબર્ન
અને
વહીદા રહેમાનનું અભિરામ સૌંદર્ય!
મનોરમ સંગિની
મહાશ્વેતાનું
એ
અપરિમેય લાવણ્ય!
પરબ, જુલાઈ૨૦૧૪