અર્વાચીન ગુજરાતી કાવ્યસંપદા/યોગેશ જોષી/સોનેરી પતંગ

સોનેરી પતંગ

યોગેશ જોષી

નાનો હતો ત્યારે
કપાયેલા એક સોનેરી પતંગ પાછળ
દોડતો...
પવન સાથે સેલારા લેતા એ પતંગના
દોરનો છેડો
મારી આંગળીઓથી
જરીક જ દૂર રહેતો...
હું કૂદકો મારતો
તો લટકતા દોરને છેડોય
જરીક ઊંચે જતો...!
ખુલ્લા મેદાનમાં
એ સોનેરી પતંગની
પાછળ ને પાછળ
હું દોડ્યા કરતો...
પતંગ ઊંચેની હવામાં
ઊંચે ને ઊંચે તો નહોતો જતો
પણ નીચેય નહોતો આવતો...
હજીય હું
દોડ્યા કરું છું આ પૃથ્વી પર...
સોનેરી પતંગ હવે
એકાદ વેંત જ દૂર છે...
મેં
હાથ
લંબાવ્યો છે
ક્ષિતિજ રેખાની બહાર
પેલે પાર... ...
ગુજરાત, દીપોત્સવી