કંદરા/સ્પાઈડરમૅન
મને એક પાંદડું મળ્યું.
લીલું, તાજું, કૂમળું.
અંદર એક સીધી લીટી
અને એમાંથી બંને તરફની પ્રસરતી શિરાઓ.
જાણે સુંદર, લાંબા રસ્તાઓ હોય
અને દરેક રસ્તો કોઈ જુદા જ સ્થળે
ખુલતો હોય.
મેં એ પાંદડું જાળવીને
એક પુસ્તકની વચ્ચે મૂકી દીધું.
આજે કેટલાય વખત પછી
ફરીથી મેં એને જોયું.
રંગ હવે દરિયાઈ પ્રાણી જેવો
આકરો લીલો થઈ ગયો છે.
અંદરની શિરાઓ
સૂકી, બટકણી થઈ ગઈ છે.
એ પાંદડાની સાથે એક લીલી ઈયળ પણ હતી.
એ કયાં ચાલી ગઈ?
આજે પણ, એ પાંદડું છે હજી,
મારી પાસે.
અસલ તાંબાના ગ્લાસ જેવું.
જેની ઉપર કોતરાયેલી હોય
સ્પાઈડરમેન જેવી
સ્પષ્ટ, ચોક્કસ, સ્થિર, સુરેખ,
શિરાઓ.
એકબીજાની ખૂબ નજીક નજીક.
❏