કાવ્ય-આચમન શ્રેણી – સુરેશ દલાલ/તમે – અમે

૨૯. તમે-અમે

રાતદિવસનો રસ્તો વ્હાલમ નહીં તો ખૂટે કેમ?
તમે પ્રેમની વાતો કરજો : અમે કરીશું પ્રેમ.

તમે રેતી કે હથેલી ઉપર લખો તમારું નામ,
અમે એટલા ઘેલા, ઘાયલ : નહીં નામ કે ઠામ.

તમને તો કોઈ કારણ અમને નહીં બહાનાં નહીં વ્હેમ,
તમે પ્રેમની વાતો કરજો : અમે કરીશું પ્રેમ.

તમને વાદળ, ધુમ્મસ વહાલાં અમને ઊજળી રાત,
અમે તમારાં ચરણ ચૂમશું થઈને પારિજાત.

અહો આંખથી ગંગાયમુના વહે એમ ને એમ,
તમે પ્રેમની વાતો કરજો : અમે કરીશું પ્રેમ.

સપ્ટેમ્બર ૧૯૭૧ ⁠(કાવ્યસૃષ્ટિ, પૃ. ૨૪૪)