ચૂંદડી ભાગ 2/58.માઝામાં રે’જો

58.

[વરને પોતાની વિલાસ-મર્યાદા ન વળોટવા વીનવે છે. પહેલી પંક્તિ તો લોકગીતની છે, પણ બાકીનું ગીત આધુનિક રચના જણાય છે. ઘોઘા તરફના નાગરોમાં ગવાતું હોવાનું જણાય છે.]

માઝામાં રે’જો, રાયવર, માઝામાં રે’જો!
આંબાની ડાળ્યે બેઠી કોયલ બોલે.
કાચી કેરીમાં રસ નો’યે, પરધાન રાયવર!
માઝામાં રે’જો!

ગુંજારવ કરતો આ ભમરો ભણે છે,
કાચી કળીમાં મધ નો’યે, પરધાન રાયવર!
માઝામાં રે’જો!

સૂરજ સાખસી એમ પૂરે છે,
ધરમ ધારીને તમે રે’જો! પરધાન રાયવર!
માઝામાં રે’જો!