મંગલમ્/દિલમાં દીવો કરો

દિલમાં દીવો કરો

દિલમાં દીવો કરો, રે દીવો કરો,
કૂડાં કામ ક્રોધને પરહરો રે, દિલમાં દીવો કરો.
દયા દિવેલ પ્રેમ પરણાયું લાવો,
માંહી સુરતાની દિવેટ બનાવો;
મહીં બ્રહ્મ-અગ્નિને ચેતાવો રે. દિલમાં…
સાચા દિલનો દીવો જ્યારે થાશે,
ત્યારે અંધારું મટી જાશે;
પછી બ્રહ્મલોક તો ઓળખાશે રે. દિલમાં…
દીવો અણભે પ્રગટે એવો, ટાળે તિમિરના જેવો;
એને નેણે તો નીરખીને લેવો રે. દિલમાં…
દાસ રણછોડે ઘર સંભાળ્યું, જડી કૂંચી ને ઊઘડ્યું તાળું;
થયું ભોમંડળમાં અજવાળું રે. દિલમાં…