રમણીક અગ્રાવતની કવિતા/કંકુથાપા

૩૧. કંકુથાપા

એક થાપામાં મૂક્યું બાળપણ જી રે
બીજા થાપામાં માનાં હેત જો
⁠પગલાંમાં પગલું મૂકી નીસરી જી રે...

ઊંચી અભરાઈએ મૂકી ઢીંગલી જી રે
અડખેપડખે મૂક્યાં પાટી-પેન જો
⁠પગલાંમાં પગલું મૂકી નીસરી જી રે...

ઉંબર ઓળંગું ને કોણ રોકતું જી રે
અણોસરો ઊભો આઘે ભાઈ જો
⁠પગલાંમાં પગલું મૂકી નીસરી જી રે...

ફળિયામાં આંબો કોઈ ઝૂકિયો જી રે
માથે ઝળુંબે એની શાખ જો
⁠પગલાંમાં પગલું મૂકી નીસરી જી રે...

છોડ્યું પાદર છોડી સીમને જી રે
છોડ્યા છેટે સૈયરુંના સાદ જો
⁠પગલાંમાં પગલું મૂકી નીસરી જી રે