વેણીનાં ફૂલ/વીંઝણો

વીંઝણો

[ઢાળ-વહુવારૂને કોણ મનાવા જાય!]

આકાશે આ વીંઝણલો કોણ વાય!
રજની રે! તારો સલૂણો શશિયર રાણો વાય,
વીંઝણલામાં તારલિયાળી ભાત.

ધરતીમાં એ વીંઝણલો કોણ વાય!
સરિતાજી! તારો સાયબો સાયર રાણો વાય,
વીંઝણલામાં માછલિયાળી ભાત.

સરવર પાલે વીંઝણલો કોણ વાય!
કોયલ! તારો કંથ આંબો રાણો વાય,
વીંઝણલામાં મંજરિયાળી ભાત.

વાડીમાં એ વીંઝણલો કોણ વાય!
ઢેલડ! તારો વર રે મોરલિયોજી વાય,
વીંઝણલામાં ચાંદલિયાળી ભાત.
​
પીંજર પેસી વીંઝણલો કોણ વાય!
મેનાજી! તારો પિયુડો પોપટ રાણો વાય,
વીંઝણલામાં પીંછલિયાળી ભાત.

ગોખે બેસી વીંઝણલો કોણ વાય!
નણદલબાનો વીર વાલોજી મારો વાય,
વીંઝણલામાં રામ સીતાજીની ભાત.