હરીશ મીનાશ્રુની કવિતા/ઘા ઉપર ચપટી લવણ આપું તને

ઘા ઉપર ચપટી લવણ આપું તને

ઘા ઉપર ચપટી લવણ આપું તને
પ્રેમની અકસીર ક્ષણ આપું તને

નિષ્પલક આંખોને શું આપી શકું
જળનાં ટીપે જાગરણ આપું તને

મધ્યબિંદુમાં ગહન પથ ઊઘડે
ચાખડી આપું, ચરણ આપું તને

શલ્ય ખૂંપ્યું હોય તારા મર્મમાં
એમ મારું સાંભરણ આપું તને

કે સ્વયં નર્તન છે એનું નામ તો
રણઝણણ નૂપુરશ્ચરણ આપું તને

વિશ્વ છો વિખરાય રઝળુ ગંધમાં
હું કમળ મધ્યે શરણ આપું તને