અર્વાચીન ગુજરાતી કાવ્યસંપદા/જગદીશ વ્યાસ/એટલામાં તો

From Ekatra Wiki
Revision as of 08:25, 22 July 2021 by MeghaBhavsar (talk | contribs) (Created page with "{{SetTitle}} {{Heading|એટલામાં તો| જગદીશ વ્યાસ}} <poem> આપણે હજી જાણતાં નથી એકબીજાનું...")
(diff) ← Older revision | Latest revision (diff) | Newer revision → (diff)
Jump to navigation Jump to search


એટલામાં તો

જગદીશ વ્યાસ

આપણે હજી જાણતાં નથી એકબીજાનું નામ
એટલામાં તો આપણાં બેની વાત કરે છે ગામ.

જાઉં હું દોરો વ્હોરવા મને ખ્યાલ ન તારો હોય
એ જ દુકાને તુંય આવે વ્હોરવા માટે સોય
ગામ એવું કે હાલતાં ભેગાં થઈએ ઠામોઠામ
એટલામાં તો આપણાં બેની વાત કરે છે ગામ.

એકબીજાનું સાંભળ્યું નથી આપણે એકે વેણ
આપણી વચ્ચે આટલી છે બસ લેણ ગણો કે દેણ
નેણ મળે કે અમથું હસી પડતાં સામોસામ
એટલામાં તો આપણાં બેની વાત કરે છે ગામ.

કાલ સાંજે તો આરતી ટાણે ભીડ જામી’તી બહુ
‘જય અંબે મા, જય અંબે મા’ ધૂન ગાતાં’તાં સહુ
ધૂન ગાતાં’તાં આપણે ‘રાધેશ્યામ હો રાધેશ્યામ’
એટલામાં તો આપણાં બેની વાત કરે છે ગામ