ગુજરાતી નારીસંપદા : કવિતા/કંઈ નક્કર મારે દેવું...

કંઈ નક્કર મારે દેવું

ગિરા ભટ્ટ

⯐

કંઈ નક્કર મારે દેવું.
યુગના યુગ વહી જાયે તો પણ, રહે વસંત જેવું...
પરપોટા પાથરીએ ત્યારે,
પળમાં ખર-ખર થાય.
મથામણને અંતે શિવજી,
ગંગાજીથી ન્હાય.
પુનઃપુનઃ નહીં જીવનયાત્રા, ધ્રુવતારકનું કહેવું...
કંઈ નક્કર મારે દેવું....
પર્ણે-પર્ણે લખવી મારે,
ઝાકળ જેવી જાત.
કાલિદાસની કલમ થઈને,
ચીતરું ભરતની વાત.
અડકો-તડકો પળમાં ભડકો, હિમગિરિ થઈ રહેવું...
કંઈ નક્કર મારે દેવું...

***