કાવ્ય-આચમન શ્રેણી – ચંદ્રકાન્ત શેઠ/૪૭. અગિયાર આફ્રિકી કાવ્યોમાંથી

૪૭. અગિયાર આફ્રિકી કાવ્યોમાંથી

ચંદ્રકાન્ત શેઠ

<poem> ૪. મસાઇમારાના આકાશમાં ચંદ્ર ઓ રહ્યો પેલો રૂપેરી દડો કોઈ શ્યામાંગનાના લાવણ્યસર-શા

વ્યોમ-પટમાં તરતો-સરતો!

મસાઇમારાના કોઈ જિરાફે

ઊંચી ડોકે ફંગોળ્યો હશે એને અહીંયાં

કે કોઈ તોતિંગ ગજરાજે

લાંબી સૂંઢે લપેટીને

ઉછાળ્યો હશે એને અહીંયાં?

એ દડાનો મીઠો માંસલ પિંડ જોતાં પેલી ઝાડીમાંના સિંહશાવકના પંજા

સળવળતા હશે

પોતાના તીખા નહોર એમાં ખૂંપાવી દેવાને,

આ તરફ શ્યામ અશ્વો-સમા

હબસી તરુણોના ચરણ પણ

થનગનતા હશે

પેલા દડાને ક્ષિતિજની ઓ પાર પહોંચાડવાને.

મૂર્તિમંત અમાવાસ્યા-શી

કોઈ સ્નિગ્ધ શ્યામાંગના

પોતાના શ્યામ સ્તનની જેમ

ગૌર ચંદ્રનેય

ચુસ્તીથી, હથેલી આડે દબાવતી,

ખુલ્લંખુલ્લા લલકારે છે

પેલા તીથા તરુણોના દેહને

માઝમરાતે – મઝધારે!

કમ્પાલા,

૮-૬-૨૦૦૨

(ભીની હવા ભીના શ્વાસ, ૨૦૦૮, પૃ. ૪૨)