મધ્યકાલીન ગુજરાતી કાવ્યસંપદા/ભાલણ પદ (૯)

પદ (૯)

રમણ સોની

પિયુજી મને મોકલો
પિયુજી મને મોકલો, હું તો ગોકુળ જાઉં રે;
પ્રાણજીવનનું મુખડું જોઈ, કાંઈ એક સુખણી થાઉં રે.         પિયુજી ૧

અલવે મારી આંખડીએ, એકવાર નિહાળું રે;
વિરહ વ્યાપી રહ્યો છે મનને, તે વેદના ટાળું રે.          પિયુજી ૨

છૂટાં છૂટાં પુન્ય કરી ત્યાં, જાવા ચિત્ત લાગે રે;
તમે રહેજો પાપી પાસે, થયો ભાવ નિપાગે રે.          પિયુજી ૩

જેમ રહે છે રોહિણી, તેમ રહીશું એ પાસે રે;
રાત્ર દિવસ આનંદે રહેશું, મુખ જોવાની આશે રે.          પિયુજી ૪

છાશ લેવાનું મિષ કરીને, અમે મંદિર તેને જાશું રે;
રમતો દેખી હૈડે ચાંપી, ક્ષણું એક સુખિયાં થાશું રે.          પિયુજી ૫

કુંવર જો નહિ ઓલખે તો, સાંઈડું લઈશું ગાઢું રે,
ભાલણપ્રભુ રઘુનાથ જોઈ, હૈડું થાશે ટાઢું રે.          પિયુજી ૬