શ્રેષ્ઠ ચંદ્રકાન્ત શેઠ/૬૭. કેમ ઊઘડે શબ્દ?
Revision as of 13:17, 9 July 2022 by KhyatiJoshi (talk | contribs) (Created page with "{{SetTitle}} {{Heading|૬૭. કેમ ઊઘડે શબ્દ?|}} <poem> કેમ ઊઘડે શબ્દ? – અરે! જો અંદરથી હું બં...")
૬૭. કેમ ઊઘડે શબ્દ?
કેમ ઊઘડે શબ્દ?
– અરે! જો અંદરથી હું બંધ!
કેમ ઊઘડે રંગ?
– અરે! જો અંદરથી હું અંધ!
કેટકેટલાં પંખી આવે?
ડાળે ડાળે કલરવ!
સવારનાં કિરણોનો કેવો
પાને પાને પદરવ!
કેમ લ્હેરખી અડે?
– શ્વાસ જો રાખે નહિ સંબંધ! –
કેટકેટલાં ચાંદરણાં લઈ
રૂમઝૂમ આવે રાતો!
કેટકેટલી દરિયાઓના
દિલની ઊછળે વાતો!
કેમ ખાલીપો ખસે?
– રહે જો હૈયે હિમ અકબંધ? –
૨૦-૧૦-૧૯૯૫
(ઊંડાણમાંથી આવે, ઊંચાણમાં લઈ જાય…, ૨૦૦૪, પૃ. ૩)