અર્વાચીન ગુજરાતી કાવ્યસંપદા/ન્હાનાલાલ દ. કવિ/એ રત

મ્હોરી મ્હોરી આંબલિયા કેરી ડાળ રે,
         એ રત આવી, ને રાજ! આવજો!

ઝીલે નીરે સારસ સરોવરપાળ રે,
         એ રત આવી, ને રાજ! આવજો!

કુંજે કુંજે વાઘા સજ્યા નવરંગ રે,
         એ રત આવી, ને રાજ! આવજો!

ચન્દ્ર હસી અજવાળે રજનીનાં અંગ રે,
         એ રત આવી, ને રાજ! આવજો!

તેજ મધુર વરસે, ને વિશ્વ મહીં ન્હાય રે,
         એ રત આવી, ને રાજ! આવજો!

લીલો પેલો વનનો મંડપ ઝોલાં ખાય રે,
         એ રત આવી, ને રાજ! આવજો!

ઊભી ઊભી નીરખું છું વાટ અલબેલ રે!
         એ રત આવી, ને રાજ! આવજો!

ફૂલડેથી લૂમી-ઝૂમી મારી વેલ રે,
         એ રત આવી, ને રાજ! આવજો!
(ન્હાના ન્હાના રાસ, ભાગ-૧, પૃ. ૧૪)