કાવ્ય-આચમન શ્રેણી – પન્ના નાયક/૧૯. મુસાફરો
Jump to navigation
Jump to search
૧૯. મુસાફરો
સંધ્યાકાળે
ક્યારના
કોઈ ટ્રેનની રાહ જોતા
બાંકડે બેઠેલા
મુસાફરો—
અવરજવર વિનાનું સૂનું પ્લૅટફોર્મ
ઇન્ડિકેટરના સ્તબ્ધ થઈ ગયેલા હાથ
લાંબા થઈને સૂઈ ગયેલા પાટા
ન ઊતરી કે ચડી શકતાં પુલનાં પગથિયાં
મોઢે તાળું મારી વસાઈ ગયેલી છાપાંની દુકાન
ખખડાટને ગળામાં અટકાવી
જંપી ગયેલી પીણાંની શીશીઓ
અંધારામાં ઝાઝું ન જોઈ શકતી ઊભેલી
ઝાંખી બત્તીઓ…
આવા સાવ નિર્જીવ વાતાવરણને
કંઈક અંશે સભર કરતો
અને અમથી અમથી ઉડાડેલી રજકણોના બાચકા ભરી
બળેલાંજળેલાં વેરાયેલાં સિગારેટનાં ઠૂંઠાં સાથે
સંવનન કરતો
હરાયો સૂકો-લુખ્ખો પવન…
આ બધાંની વચ્ચે
સંધ્યાકાળે
બાંકડે બેઠેલા
મુસાફરો.
(વિદેશિની, પૃ. ૨૭૨-૨૭૩)