કંદમૂળ/આશ્રય

આશ્રય

અંધકારમાં ઓગળી રહેલી ગુફાઓના રેલા
આવી પહોંચ્યા છે મારા ઘર સુધી.
મારા ઘરની પછીતે ભરાયેલાં
એક ખાબોચિયામાં તરી રહેલા સાપ પણ
હવે એ રેલા ભેગા,
આવી પહોંચશે મારા ઘરમાં.
એક વાર આમ જ આવી પહોંચ્યા હતા
ધસમસતા યાક મારા ઘરમાં,
જ્યારે ઓગળ્યા હતા હિમના પર્વતો.
એમ તો જ્યારે પેલી નદી છલકાઈ ગયેલી ત્યારે
કેટલાક મગર પણ
તણાઈ આવ્યા હતા મારા ઘરમાં.
મારું ઘર,
કંઈ કેટલાયે જીવોનું આશ્રયસ્થાન,
અને હું પણ,
રહું છું મારા ઘરમાં, આશ્રિત.
મને પોતાને મારાથી બચાવતી હું,
ઘણી વાર નીકળી પડું છું
ઘરની બહાર,
અને ઘરની બહારનાં જીવન
પ્રવેશી જાય છે મારા ઘરમાં.