કંદરા/સસ્યસંપત્તિ

સસ્યસંપત્તિ

હું હવે માંગુ
પ્રતિસ્મૃતિની વિદ્યા,
ઈન્દ્રિયગમ્યતા તો છેક
મારી ચામડીના મૂળમાં,
એને ઉતરડું તોયે કેમ કરીને?
પાણીમાં તરતા રહેતા સ્પર્શોને ગ્રહી લેવા
કીકીઓ પારદર્શક બનવા મથે.
પણ એ સ્પર્શોને તો
પાણીમાં યે જાણે રક્ષે છે
લીલી નસોનું જાળું.
એ સ્પર્શોમાં છે મારું આદિમ સુખ,
પણ આ પાણી!
એ શાંત, ઠંડાં બરફ થઈને રહેશે
કે પછી જઈ પહોંચશે
કોઈ એવા પ્રદેશમાં
જ્યાં એ સ્પર્શો ઊગી શકે,
સસ્યસંપત્તિ બનીને.
❏