સિગ્નેચર પોયમ્સ/નવ કરશો કોઈ શોક – નર્મદ

નવ કરશો કોઈ શોક

વીર કવિ નર્મદ

નવ કરશો કોઈ શોક, રસિકડાં, નવ કરશો કોઈ શોક. – ટેક
યથાશક્તિ રસપાન કરાવ્યું, સેવા કીધી બનતી. રસિકડાં∘︎
પ્રેમી અંશને રુદન આવશે, શઠ હરખાશે મનથી. રસિકડાં∘︎
મર્મ ન સમજે બકે શંખ શઠ, વાંકું ભણે બહુ પણથી. રસિકડાં∘︎
એક પીડમાં બીજી ચીડથી, જળશે જીવ અગનથી. રસિકડાં∘︎
હતો દુખિયો થયો સુખિયો, સમજ્યો છૂટ્યો રણથી. રસિકડાં∘︎
મૂઓ હું તમો પણ વળી મરશો, મુક્ત થશો જગતમથી.⁠ રસિકડાં∘︎
હરિકૃપાથી મમ લેખચિત્રથી, જીવતો છઉં હું દમથી. રસિકડાં∘︎
વીર સત્ય ને રસિક ટેકીપણું, અરિ પણ ગાશે દિલથી. રસિકડાં∘︎
જુદાઈ દુઃખ તે નથી જ જવાનું, જાયે માત્ર મરણથી. રસિકડાં∘︎
મરણ પ્રેમીને ખચીત મોડું છે, દુઃખ વધે જ રુદનથી. રસિકડાં∘︎
જગતનીમ છે જનમ મરણનો, દૃઢ રહેજો હિંમતથી. રસિકડાં∘︎
મને વિસારી રામ સમરજો, સુખી થાશો એ લતથી. રસિકડાં∘︎