કાવ્ય-આચમન શ્રેણી – મનુભાઈ ત્રિવેદી/અમને ગુરુ મળ્યા છે ગરવા
Jump to navigation
Jump to search
૨૪. અમને ગુરુ મળ્યા છે ગરવા
અમને ગુરુ મળ્યા છે ગરવા —
એના શબદ ગયા સોંસરવા :
અમને ગુરુ મળ્યા છે ગરવા.
આભ અવાકની વાણ સુણાવી,
ઝમ્યા નેહ મેઘરવા;
ટીપે ટીપે ધાર ઝવી, એને
ઝીલી થયા અમે નરવા. —
અમને ગુરુ મળ્યા છે ગરવા.
અંબરથીય અતિ અતિ ઊંચે
બાંધ્યા ચિત્ત ચંદરવા;
મન માંડવડે મનહર જ્યોતિ
જળી રહી તમ હરવા. —
અમને ગુરુ મળ્યા છે ગરવા.
શબદ સોંસરવા સર્યા મૌનમાં,
મોંઘે મોત એ મરવાં;
સદ્ગુરુ, અમને જુગતિ બતાવો
પંડ પાર પરવરવા. —
અમને ગુરુ મળ્યા છે ગરવા.
(સુરતા, પૃ. ૧૩)