કાવ્ય-આચમન શ્રેણી – સુરેશ દલાલ/Pre-Scription

૩૬. Pre-Scription

તમને તારાઓની બારાખડી ઉકેલતાં આવડે છે?
— તો લખો.
તમને ફૂલોની પાંખડીમાં પ્રવેશતાં આવડે છે?
— તો લખો.
તમને ક્ષણની આંખડીમાં કશુંક આંજતાં આવડે છે?
— તો લખો.
તમને રણના વિષાદને મૃગજળથી માંજતાં આવડે છે?
— તો લખો.
તમને આંખમાં આવેલા વાદળને નહીં વરસાવતા આવડે છે?
— તો લખો.
તમને મેઘધનુષને સુક્કી ધરતી પર વાવતાં આવડે છે?
— તો લખો.
તમને લોકોની વચ્ચે તમારી સાથે રહેતાં આવડે છે?
— તો લખો.
તમને તમારાથી પણ છૂટા પડતાં આવડે છે?
— તો લખો.
તમને કંઈ પણ આવડતું નથી
એ અવસ્થા પર ઊભા રહેતાં આવડે છે?
— તો લખો.

૮-૧૨-૧૯૮૦⁠(કાવ્યસૃષ્ટિ, પૃ. ૪૯૫)