અર્વાચીન ગુજરાતી કાવ્યસંપદા/રાજેન્દ્ર શાહ/આવડ્યું એનો અરથ (વનવાસીનું ગીત: ૪)

આવડ્યું એનો અરથ (વનવાસીનું ગીત: ૪)

રાજેન્દ્ર શાહ

કાંચળી જોઈને કાયર ભાગે ને મૌવર માંડે મરદ,
સાત પાતાળનાં ભોંયરાં ભેદીને આવતી નાગણ
         રાગનું એનેય દરદ… કાંચળી.

         વાંસમાં ઘેરાય વાયરો, ન્યાંથી
                  ઊપને મધુર વૅણ,
         નૅણ-લુભામણ રૂપની રે તંઈ
                  ડોલતી રમે ફેણ;
આપણી સામે ચાલ જેવી, હોય આપણી તેવી મરડ… કાંચળી.

         ઊજળો દ્હાડો હોય કાળો અંધાર
                  ચારેગમ મોતની ડણક,
                  આપણોયે ટંકાર બોલે ઈમ
                  રાખીએ તાણી તીરની પણછ;
દાવ ચૂક્યાનું કામ નહીં, અહીં આવડ્યું એનો અરથ… કાંચળી.

(સંકલિત કવિતા, પૃ. ૩૦૯-૩૧૦)