મંગલમ્/મેહુલિયો
Jump to navigation
Jump to search
મેહુલિયો
તારે મેહુલિયા કરવાં તોફાન
અમારા લોકોના જાય છે જાન
મંડ્યો ને મંડ્યો મુશળધાર
કેમ કરી જાવું મારે નિશાળ …તારે૦
ચંપલ મારી છબ છબ થાય
ધોયેલી લેંઘી મારી બગડી જાય
કેળાંનાં છોતરાંથી લપસી જવાય
ત્યારે તો ભાઈ મને કાંઈ કાંઈ થાય …તારે૦
અવળા ને સવળા વાયરા વાય
ઓઢેલી છત્રીનો કાગડો થાય
દોડે મોટરની હારોહાર
ખસવું પડે મારે વારંવાર …તારે૦
તારું મેહુલિયા કયું છે ગામ?
તારા બાપુજીનું શું છે નામ?
ઘણા દિવસથી આવ્યો છે અહીં
કેમ તારી બા તને લઈ જાય નહીં
તારે મેહુલિયા કરવાં તોફાન
અમારા લોકોના જાય છે જાન