મંગલમ્/નૂતન વસંત
નૂતન વસંત
卐
નૂતન વસંત
卐
નૂતન વસંત નર્તન જાગે, વન વન બાગે બાગે,
કિલ કિલ ગુંજે અલી ગુંજારવ મદભર મત્ત પરાગે,
સ૨વ૨ ઊઘડે કમલ કટોરી, કિરણ સ્પર્શ અનુરાગે.
લજ્જા ભારે લચી મંજરી સુરભિત નવ સુહાગે,
સઘન ઘટામાં મગન કોકિલા કૂજે પંચમ રાગે.
કેસૂડાની કલગી ખોસી, કોક કનૈયો આવે,
વગડાનો મારગડો રોકી, ગોરસ મીઠાં માગે,
અગન રંગની ગગન ઘેરતી, ઝલક છલકતી આવે,
ઢોળાતી આવે ધરતીમાં, મનને મુકુલિત બાગે.
થંભે વહેતી ઝરણ ઝાંઝરી, હરણ તરણને ત્યાગે,
દિશ દિશ બજતી ગહન બંસરી, જલથલ વિંધી વાગે.