અર્વાચીન ગુજરાતી કાવ્યસંપદા/હસિત બૂચ/દિલની વાતો

દિલની વાતો

હસિત બૂચ

દિલની વાતો ખૂટશે ત્યારે
હાથ જોડીને હીંડતા થશું;
ઊડતો બેડો ઝૂકશે, ત્યારે
કોઈ તો કેડો ચીંધતા જશું.
પગની રોનક ઓસરે તોયે
નાચવું, એમાં માનીએ નહિ
થાકતે હાથે કોઈ દી અમે
બૂંગિયો ઢોલ બજાવીએ નહિ!
આપણે કર્યું, અદકું એથી
કરશે બીજાં: શીખતા જશું.
આભના તારા મલકે હજી,
આંખના છેડા છલકે હજી,
એકની પાછળ એક સલૂણી
ગીતની કડી આતી હજી;—
એ જ અધૂરપ માણશું, અમે
એ જ મધુરપ સીંચતા થશું.
વેળ હતી, ને આવિયા અમે
વેળ થઈ છે; હીંડતા થશું;
મળિયાં એવાં દિલ અહીં કે,
મ્હેક બધે એ ચીંધતા જશું.