અર્વાચીન ગુજરાતી કાવ્યસંપદા/હરિકૃષ્ણ પાઠક/ઘટના એવી

ઘટના એવી

હરિકૃષ્ણ પાઠક

ઘટના એવી કંી અણઘટી
કેમે ના પરખાય એવડી ઊંડી ને અટપટી
ઘટના એવી કંઈ અણઘટી.

કિયે વાયરે ઊઠી એમાં કોણે પૂર્યા રંગ,
સાન કશી ના મળે છતાં સૌ સાંભળનારાં દૃગ.
ઘડીક ઊજળે અંગે, ઘડીમાં મેલી માથાવટી.
ઘટના એવી કંઈ અણઘટી.

મૂળ જડે નહિ મનમાં, તનમાં ફેલાવે કંઈ તાપ,
ગયું કોઈ પ્રગટાવી કે એ પ્રગટી આપોઆપ?
મથું ખાળવા ત્યાં તો ભાળું – જતા વેળની વટી.
ઘટના એવી કંઈ અણઘટી.

અસમંજણના અણઘડ આંટે અથરો અથરો બેસું;
પરોવાઈને વળતો પાછો, પાછો વળતો પેસું...
ખરેખર કંઈ થયું ન’તું તો ગયું હવે શું મટી?
ઘટના એવી કંઈ અણઘટી.
(પરબ, એપ્રિલ ૨૦૦૬, ‘ઘટના ઘાટે’, પૃ. ૯)