અર્વાચીન ગુજરાતી કાવ્યસંપદા/નલિન રાવળ/કાવ્ય (એનું મૂળ પૃથ્વીના...)
Jump to navigation
Jump to search
કાવ્ય (એનું મૂળ પૃથ્વીના...)
નલિન રાવળ
એનું મૂળ
પૃથ્વીના અંતરાલમાં
ગર્જતા લાવાના સમુદ્રતલની
તળે
ખડકની ટોચ ઉપર
ફૂટતા
સહસ્રદલ પદ્મની નાભિમાં
એની શાખ-પ્રશાખા
ભાનુના ભર્ગનીય પારના ભર્ગમાં ઝલમલે
પણ રાત્રિએ ચન્દ્ર ડોલાવતી
એની પર્ણ મર્મર
હજાર હૈયાં પર ઝરમરે
ત્યારે
મને અનહદ ગમે.