અર્વાચીન ગુજરાતી કાવ્યસંપદા/યોગેશ જોષી/વાવ : ૧. ભીતર એક નાવ લઈને...
Jump to navigation
Jump to search
વાવ : ૧. ભીતર એક નાવ લઈને...
યોગેશ જોષી
નિરુદ્દેશે
ગાઢ વનમાં વિહરતાં વિહરતાં
જડી આવી
એક અવાવરું વાવ!
વાવમાંનું જળ થીજેલું!
થીજેલી
વાવમાંની હવા!
થીજેલી
હવડ ગંધ!
જાણું છું —
વાવના આંધળા-બહેરા જળમાં
મુકાય નહિ
એકેય નાવ!
આમ છતાં
ભીતર એક નાવ લઈને
વાવનાં ખંડિત પગથિયાં
ઊતરતો રહ્યો
ઊ
ત
ર
તો
જ
રહ્યો...
નથી કળાતું પાણી
કે
નથી આવતું
છેલ્લું પગથિયું!
ક્યાં સુધી
ઊતર્યાં જ કરવાનાં
આ
જૂનાં-પુરાણાં પગથિયાં?!