અર્વાચીન ગુજરાતી કાવ્યસંપદા/હરિહર ભટ્ટ/એક જ દે ચિનગારી

એક જ દે ચિનગારી

હરિહર ભટ્ટ

એક જ દે ચિનગારી મહાનલ!
                  એક જ દે ચિનગારી,
ચકમક લોઢું ઘસતાં ઘસતાં
                  ખરચી જિંદગી સારી;
જામગરીમાં તણખો ન પડ્યો,
         ન ફળી મહેનત મારી...          મહાનલ.

ચાંદો સળગ્યો, સૂરજ સળગ્યો,
         સળગી આભ-અટારી;
ના સળગી એક સગડી મારી,
         વાત વિપતની ભારી...          મહાનલ.

ઠંડીમાં મુજ કાયા થથરે,
         ખૂટી ધીરજ મારી;
વિશ્વાનલ! હું અધિક ન માગું,
         માગું એક ચિનગારી...          મહાનલ.

(હૃદયરંગ, ૧૯૩૪, પૃ. ૧૧)