કાવ્ય-આચમન શ્રેણી – ચંદ્રકાન્ત શેઠ/૫૧. વિશ્વકોશ-ગીત

૫૧. વિશ્વકોશ-ગીત¹

ચંદ્રકાન્ત શેઠ

અહીં જ્ઞાનસૂર્ય સંચરે,
આપણું ચિત્ત પ્રકાશિત કરે...
અહીં જ્ઞાનયજ્ઞ સૌ કરે,
ચિત્તનું વિશ્વ વિકાસિત કરે...

શબ્દ-પ્રકાશે અર્થ-ઉજાશે,
તર્ક-મર્મના સહજ વિકાસે,
જ્ઞાનામૃત નિર્ઝરે...
અર્ઘ્ય સૌ સત્યદેવને ધરે...

ધન્ય ગુર્જરીની શુભ દૃષ્ટિ,
વિશ્વકોશની એવી સૃષ્ટિ :
તમસ-તાપ સંહરે...
અંતરે સુખ સમજણનું ઠરે...

રેવા-જળ-શી શક્તિદાયિની,
સત્ય-સંમુદા-મુક્તિદાયિની!
‘વિશ્વવિહાર’ જ કરે...
શીલ-સત્ત્વ સંભરે...
ગુર્જરી વિશ્વરૂપને વરે!...

(હદમાં અનહદ, ૨૦૧૭, પૃ. ૧૧૧)

_________________________________

1 ‘ગુજરાતી વિશ્વકોશ’નું કાર્ય કરતી સંસ્થા માટેનું ગીત