કાવ્ય-આચમન શ્રેણી – હરિકૃષ્ણ પાઠક/૪૯. મનહરા
Jump to navigation
Jump to search
૪૯. મનહરા
બે અક્ષર તો બોલ, મનહરા;
લગરીક આંખો ખોલ, મનહરા.
ચગી રહ્યો’તો મધ્યાકાશે;
કોણે નાખ્યો ઝોલ, મનહરા.
‘ડફોળ’ તેં ભાખ્યો’તો જેને
ના સમજ્યો તુજ મોલ, મનહરા.
અજબ-ગજબ કંઈ ઇલમી રચવા
કોઈ ન તારે તોલ, મનહરા.
શબ્દોનાં તળિયાં તાગીને
કોણ પકડશે પોલ, મનહરા.
હવે અગાસી ક્યાં જઈ ફરશે;
ક્યાં કરશે કલ્લોલ, મનહરા.
દરિયા તેં અગિયાર લખાવ્યા,
પાળી જાણ્યો કૉલ, મનહરા.
આઘેથી અથડાયો એવો
ભાષા હાલમડોલ, મનહરા.
ખાંસાહેબી, મૌજ-મજાકો
ઊભાં સાવ અબોલ, મનહરા.
ગઝલ ગુંજતી રહેશે હરદમ
માઢુને મનમ્હોલ, મનહરા.
લગરીક આંખો ખોલ, મનહરા;
બે અક્ષર તો બોલ, મનહરા.
(જળમાં લખવાં નામ, પૃ. ૩૦૨)