કાવ્ય-આચમન શ્રેણી - પ્રહ્લાદ પારેખ/૩૬. મન પાગલ થાયે

૩૬. મન પાગલ થાયે

પ્રહ્લાદ પારેખ

આજ મારું મન પાગલ થાયે રે,
શ્યામળ સજળ વાદળ જોઈ આભે ધાયે.

ચમકી ચમકી વીજ છુપાયે,
શોધે તેની જાયે;
મેઘ હસે એ ખેલને જોઈ,
કેમ રે વીજ ઝલાયે ? – શ્યામળ૦

વરસતાં એ વાદળ જોઈ,
વરસવાને ચાહે;
રંગ થકી જે મેઘ રંગાયે,
રંગ ધરે એ કાયે. – શ્યામળ૦

દૂરના–જોઈ—ડુંગર ભીંજે,
ખેતર ને વન ન્હાયે;
નીર તણી એ ધારમાં આજે,
મન મારું ભીંજાયે. – શ્યામળ૦

(સરવાણી, પૃ. ૧૫)