ગુજરાતી નારીસંપદા : કવિતા/કાંટે ગુલાબ

કાંટે ગુલાબ

ભાગીરથી મહેતા

⯐

જાણીને ઝેર પી લેવાં મનવાજી મારા,
⁠કાંટે ગુલાબ થઈ રહેવાં,
બાગબગીચે માળી સંભાળે ઘડી ઘડી,
⁠વગડામાં ફૂલ બની રહેવાં...મનવાજી.

જગનો વહેવાર ભારો સાપે વીંટાયો સારો,
⁠ડંખો સહીને ફૂલ દેવાં... મનવાજી.

દિલના દાવાનળને દિલમાં છુપાવીને,
⁠ચંદાનાં તેજ ઝીલી લેવાં...મનવાજી.

તપસી તપેશ્વર ને જોગી જોગેશ્વર,
⁠સૌએ પીધાં છે ઝેર એવાં... મનવાજી.

ઉરના બગીચામાં ફોરમ બિછાવીને,
⁠ભીતરના તાપ ભારી દેવા... મનવાજી.

***