નયન હ. દેસાઈની કાવ્યસંપદા/ટેબલ વિશે ગઝલ
Jump to navigation
Jump to search
ટેબલ વિશે ગઝલ
થાક હવે ડૂબતા સૂરજની જેમ ઢળે છે, લ્યો, ટેબલને તાળું મારો!
સાંજ પડી ને છતમાંથી એકાંત ગળે છે, લ્યો, ટેબલને તાળું મારો!
આમ જુઓ તો આ ટેબલ પર ડાઘ પડ્યા છે કૈં વરસોના, કૈં સ્વપ્નોના;
એમ વિચારો ત્યાં ભીતરથી કૈંક બળે છે, લ્યો, ટેબલને તાળું મારો!
કાલ ઊઠીને આ ટેબલને ડાળ ફૂટે તો એને ટેકે જીવતર ચાલે.
કઈ ઑફિસમાં હોવાની સી.એળ. મળે છે? લ્યો, ટેબલને તાળું મારો!
રોજની જેમ જ લોઢ ઊછળતા ટેબલપૂરમાં, આખી ઑફિસ ડૂબવા માંડી,
હાથ હજી પણ ફાઈલના વનમાં રઝળે છે; લ્યો, ટેબલને તાળું મારો!
આ જ હતું ટેબલ કે જેણે ફુલગુલાબી મઘમઘતા કૈં પત્રો વાંચ્યા,
આજ હવે ખાનામાં ‘જનકલ્યાણ’ મળે છે, લ્યો, ટેબલને તાળું મારો..!