રમણીક સોમેશ્વરની કવિતા/પંખી

The printable version is no longer supported and may have rendering errors. Please update your browser bookmarks and please use the default browser print function instead.

૨૪. પંખી

પંખી તો ઊડ્યું
ઊડ્યાં પાછળ ઝાડ
પહાડ પણ ઊડ્યા
થંભી ગયાં
નદીનાં વહેણ
સમદર થીજ્યા
લીટી થઈ લંબાયાં
ઝરણાં
પવન
સીમને વળગી બેઠો
પડછાયાની જેમ
ખેતરો
ગોળ ગોળ ફૂદરડી ફરતાં
આકાશે પથરાયાં
ચાડિયા
ચાસચાસમાં
ધોધમાર રેલાયા
આભ અને ધરતીની વચ્ચે
મેઘધનુ જેવા ડૂંડાને
લઈ ચાંચમાં
ઊડ્યું પંખી...