સમગ્રમાંથી સઘન-વિવેચનશ્રેણી – પ્રમોદકુમાર પટેલ/આ સંપાદન વિશે
ગુજરાતીના અગ્રણી વિવેચકોના સમગ્ર વિવેચનકાર્યમાંથી, વિવેચનનાં જુદાંજુદાં રૂપો-સ્વરૂપોના એમના લેખોમાંથી ઉત્તમ પ્રતિનિધિ લેખો તારવીને, તે વિવેચકની એક સઘન મુદ્રા ઉપસાવી આપવાના આ ઉપક્રમમાં પ્રમોદકુમાર પટેલના લેખોનું આ સંપાદન તૈયાર કર્યું છે. પ્રમોદકુમાર પટેલનું સૈદ્ધાન્તિક વિવેચન મૂળગામી ચિકિત્સક દૃષ્ટિવાળું છે. એમનાં સર્વ પુસ્તકોમાંથી એવા મહત્ત્વના લેખો અહીં પહેલા વિભાગમાં મૂક્યા છે. બીજા વિભાગમાંના સ્વરૂપચર્ચાના લેખો પણ સિદ્ધાંતવિચા૨નો જ એક પ્રકાર છે પણ એને જુદો તારવીને રજૂ કર્યો છે. આ વિવેચકે વિવિધ રૂપે સર્વકાલીન ગુજરાતી સાહિત્યને, વિશેષે સમકાલીન સાહિત્યને તપાસ્યું છે. એવા લેખોમાંથી તારવીને મહત્ત્વના લેખો પ્રવાહદર્શન, સર્જક-અભ્યાસ તથા કૃતિવિવેચન-સમીક્ષા એવા વિભાગો થકી રજૂ કર્યા છે. છેલ્લે પ્રમોદકુમારનાં સર્વ પુસ્તકોની, દરેક પુસ્તકમાંના લેખોના નિર્દેશ સાથેની સૂચિ પણ મૂકી છે, એ જિજ્ઞાસુઓ તથા સંશોધકોને માટે ઉપયોગી નીવડશે.
– રમણ સોની