અનુનય/કવિતા

કવિતા

સાત ખોટનાં છોરું મારી કવિતા;
કામનાની કાળી રાતનો સવિતા;
ધરાથી થોડા અધ્ધર રહેવાનો ઝૂલો,
વેદનાની વેલનાં રૂપાળાં ફૂલો.

કવિતા :
શિશુના શરીરની સુવાસ,
દૂધિયા દાંતનું હાસ;
મોડી રાત સુધી ચાલતી દાદાની વાત;
સમણામાં પરીની મુલાકાત.
સાત સાત સમુંદર ઓળંગીને આવતી
નાવડી મારી કવિતા;
માના હાથે ઘડ્યા રોટલાને તાવતી
તાવડી મારી કવિતા.

કવિતા :
વ્હાલપની વાડ પર સૂકવેલું
કુમારિકાનું ભીનું ભીનું ગવન;
ઘરની તાપણીને વળેલી રાખને ઉડાડતો
વગડાઉ પવન.

૧૪-૪-’૭૪