અર્વાચીન ગુજરાતી કાવ્યસંપદા/નંદકુમાર પાઠક/વાયરા (તારો છેડલો તે માથે)
Revision as of 10:46, 24 June 2021 by HardikSoni (talk | contribs) (Created page with "<poem> તારો છેડલો તે માથે રાખ ને જરા {{space}}આ તો ચૈતર વૈશાખના વાયરા, {{space}}{{space}...")
તારો છેડલો તે માથે રાખ ને જરા
આ તો ચૈતર વૈશાખના વાયરા,
તારી વેણીની મ્હૅક જાશે ઊડી હો
આ તો ચૈતર વૈશાખના વાયરા.
અંગારા વેરતો તડકાનો તોર કૈં,
અંગારા ઝીલતો આંખોનો તોર કૈં;
તારી આંખો અધૂકડી રાખ ને જરા
આ તો ચૈતર વૈશાખના વાયરા,
તારી નજર્યુંનાં નીર જાશે ઊડી હો
આ તો ચૈતર વૈશાખના વાયરા.
ઊના એ વાયરાને પાલવમાં પૂર ના,
ઊછળતા ઓરતા છે ઊના રે ઉરના;
તારા હૈયા પર હાથ અલી રાખ ને જરા
આ તો ચૈતર વૈશાખના વાયરા.
તારા હૈયાનાં હીર જાશે ઊડી હો
આ તો ચૈતર વૈશાખના વાયરા.
(લહેરાતાં રૂપ, પ્ર. આ. ૧૯૭૮, પૃ. ૧૩)