કંદરા/ઝેરી દૂધ
ઊંચકાયેલા ગોવર્ધનની છાંય તળે ઊભેલી
વ્રજની એક ગાય,
એની અંદર રહેતા તેત્રીસ કરોડ દેવતાઓને
ઊંઘી ગયેલા જાણીને
ચાલી નીકળી મળસ્કે.
ત્યાં ઘંટડીઓ તોડતી જતી એ ગાયને
જોઈ ગયો એક ભરવાડ
એની અંદરના જ એક દેવતા જેવો.
કદાચ ઇન્દ્ર જેવો.
દોહી લીધું એણે બધું જ ઝેરી દૂધ,
ને આદેશ આપ્યો ગાયને સગર્ભા બનવા.
હવે એની અંદર ઉછરતા બળદનું જોર
ઘાટીલાં બનાવે છે એનાં શીંગડાંને.
એની અંદર રહેતાં દેવો પણ ઉત્સુક બની જોઈ રહ્યા છે
એ બળદમાં શ્વાસ આવવાની પ્રક્રિયાને.
પણ, કલાકો સુધી ઘાસ વાગોળતી રહેતી
એ ગાયની આંખોમાંથી તો
આંસુઓની ધાર વહે છે,
જે ભીંજવી નાખે એના ગળાની લથરતી ચામડીને,
કે આ કોનું સંતાન હશે,
એનું પોતાનું,
કે ઈન્દ્રનું?
❏